yiliyo harimwa yi Taourata
Karim abaya yi
shiyo akosoma ashivutsu mezaju. Aka na
hadhwabu. A ruwazi harimwamuda ha
hufikiri swafi.
Mwandzani
wahe Abou aka amwaledza huka amba vutsolawa wutukufu muzuru wa wubinadamu
harimwa yi irham ya Ibrahima. Mungu aka
a mwambiya Ibrahima, “Haho ju zi kabila
za duniyani piya zitso barikishiha.”
Abou amwaledza huka amba Insa a dzalwa harimwa yi irham ya Ibrahima, na
haheju Insa li duniya litso barikishiha.
Wakati Ibrahima aja, vuja Isiyaka, Yaankubu na wu mwana wa Yaankubu
Judah. Insa akoyiriwa de yi Nsimba ya
lawa harimwa yi nishani ya Juda. Be
mawuri de halilo akosoma yi hadisi ya
Yaankubu, mujuhu wa Ibrahima, Karim asomo huka harimwa yi zilembwe za raru vuka
ntrambo na mbovu harimwa yi irham.
Namna
ntrini de vwakolawa ntrongo ndzuzuri harimwa yi irham ya ntrambo mawuri de
yini? Namna ntrini de Mungu atso
barikishawo zi kabila zalawa harimwa damu ya wantru wa pewu mawuri de
wani? Wusi fikiri humhada bahe afa ya
matso aliyo karibu ya hufa ha sibabu ya hu yiba wu mwarata yikawo de mwananyahe
mtrumuhu akojo aritishiwa yiyo ndzuzuri?
Abou
a rongowa huka Insa aka azidi Mtrume.
Insa aka de zi kweli na waye arongowa huka, “Zi kweli zi
tsorikombowa.” Wakati wule Abou a rongowa makalima yaka ya rongolwa na
Insa, “Wami de yi ndziya, de wu
kweli, de ya mayesha. Kavwasi muntru
atso jawo ha baba nayika kavira hanguju.”
Karim
akajiviwa na yi hadisi ya Ibrahima. Ibrahima aka muntru wa kweli aka na wu
vwamoja na Mungu. Be wu mjuhu wa handra
wahe Yaankubu kaka muntru wa kweli mawuri de bakwahe Ibrahima.
Karim
aka na suala muhimu. Namna ntrini
mwanadamu amwaminiwo Mungu wa kweli ake wapewu mawuri de Yaankubu? Karim ayendreleya na zi hazi za huwundra zahe
mawuri dayima, akotsaha adale zi ntrongo aka asoma harimwa yi shiyo be yi
fikira yahe yakoregeya kakila wakati harimwa yi
hadisi ya Yaankubu na bahe Isiyaka.
Isiyaka
aka mtrumuhu afu na ya matso. A mwiri wu
mwana wa handra wahe Izu amwambiya huka ayendre malavuni amufumiye gondzi nyeha
aje amupishiyelo mawuri de halilo alivendzawo, harimwa yi sharien Isiyaka akoja
a mwaritishe wu mwana wa handra wahe zi
baraka piya.
Mtrumshe
wahe Rabeka akiya ya mahadisa yaka bayina Mtrumshe wahe Rabeka akiya ya
mahadisa yaka bayina ya Isiyaka na Izu.
Ha wu pesi amuhiri Yaankubu, a mwambiya yi mipango ya Isiyaka ha
humwaritisha wu mwana wa handra zi baraka.
Rabeka a mwambiya Yaankubu ayendre a renge magondzi mayili ma titi
ajenayo. Yaankubu a fanya zile mahe a
mwambiya. Rabeka a pihi yi nyama yile yi
namna Isiyaka avendzawo, ayitriya masala na shirungu vuje mawuri de halilo
wantru wa yenshiwo harimwa zi ntsi za juwa la huheya wa pihawo. Yaankubu kaka sawa na Izu. Izu aka mwana mwemwa na swiha ndjama,
mustwanrabu nyangu yi hu dzwalwa yahe aka na nyele nyengi harimwa wu mwili
kamili raha na mwananyahe Yaankubu.
Rabeka
arenge baendhu ya ngozi ya li gondzi amufungu Yaankubu harimwa yi mihono na zi
nkosi yile pare bahe ahimusika asike ya mavuzi ya li gondzi.
Yaankubu
apindri mawuri de halilo mwana nyahe a pindrawo. Wakati wule Yaankubu arenge yi nyama yile
amuvingiya bahe, hazizo bahe ali yi nyama ajiviwa abuzu amwaritisha Yaankubu zi
baraka za kolazimu zi volwa mwananyahe mtrumuhu Izu.
Karim
akensi harimwa wu hura wa yi nyumba akoyiwundra. Harimwa dakika thalathini akofikiri de
yi hadisi yini. Ha zizo a lawa hwendra ha Abou ha hutsaha
mayeledzeyo ju la yi hadisi yini. Mkini shiha Abou ashindre a towe mayeledzeyo
ju la yi zitrendrwa za Yaankubu na Rabeka.
Yi suku ya vili yika mfumosi.
Karim ahimi asubwihi swafi apindri arenge yi ndziya ha hwendra mjini ha
Abou. Hu waswili yahe amupara Abou
akotabu marindri wu nyuma mwa lid ago lahe.
“Habari
za asubwihi, Karim! Ntrongo ntrini de yi
liyo mpiya? Wuja na asbwihi swafi na
wami ni sonandza. Rasa tsanwa dite. Ritsojuwa rile shahula sha asbwihi ruwayila?”
Abou
amukaribisha dagoni. Wakati wa yisa
hunwa yi dite Abou amudzisa, “Ntrongo
ntrini de nitso shindrawo niyisayidiye?”
amudzisa mwandzani wahe Karim.
“Risijiliyana kiyasi nisijuwa
huka yi lera yini waja vani na suku ya mfumonsi kwaja tu be vwa zahuveleha.”
“Tsisomo
yi hadisi ya Yaankubu.” Karim amwaledza. “Tsi taembiha na yi hadisi namna ntrini de wu rongowawo amba Insa
aka mtrume wa kwelu, awu aka azidi mtrume wakati yikawo a lawa harimwa kabila
ya pewu mawuri de ya Yaankubu? Yaankubu
aka amuhada bahe abuzu a yibi wu mwarata wa mwananyahe mtrumuhu.”
Abou
a mwangaliya Karim ha hujiviwa, “Wujuwa
nisifikiri huka wakaribu na hujuwa ntrongo muhimu harimwa yi shiyo shitukufu
sha Mungu. Mungu waye wuriva ndziya za
wasi huyelewa. Baendhu za wakati
wutsopara ntrongo harimwa ya makalima ya Mungu za husayidiya ile pare wu
yelewe. Wakati mwengi wasi wu soma be
karistamiya fetre. Wusinahana wakati
Rabeka aka amira, kaka ajuwa ntrongo zaka zamuhidjiriya ata amudzisa Mungu?”
“Ewa,
nisinahana,” Karim adjibu. “Tsiyani
harimwa yi hadisi yini. Mungu aka amwambiya: ‘Nishani mbili zitsolawa hahoju;
wutsodzaya wantru wayili. Wu moja atsoka
na nguvu raha na mnyawe; Wu mtrumuhu atso rumishiya wumtiti’.
“Tsasi
rina ntrongo ya handra ya hurisayidiya riyelewe: Mungu asimwambiya Rabeka huka amba wu mwana
mtrumuhu atsomurumishiya wumtiti.
“Vuviri
maha mengi, wana wantrubaba wani wa trendre, risomo hadisi nzduzuri ya Izu wakati alawa shambani
aja dagoni na zi ndza. Yaankubu ako piha
mtsuzi, wakonunka fetre na Izu aka na ndza swafi. Narisome mawuri de halilo
yangihwa.”
Izu
amwambiya Yaankubu: ‘Nisonandza swafi;
nimba mpavi shintru shinkundru shisho.”
Yaankubu
amudjibu: ‘Nitsohuva nayika wu nimba wu
hakikifu amba wawe de mtrumuhu.”
Izu
arongowa, ‘Tsikubali! Tsa karibu na
hufa; ntrongo ndzuzuri ntrini de wu hakikifu wangu wutsonifanyiyawo?”
Yaankubu
adjibu, ‘Handrani nimba wanhadi huka wutsonimba wu hakikifu waho.’ Izu amumba Yaankubu wanhadi na wu
hakikifu. Wakati wule Yaankubu amumba
dipe na mtsuzi.
Ali
ano na maji, ahimi ayendredzahe. Zizo de zintrongo zaka zamutriya Izu
shuguli ju la yi haki yahe mawuri mwana mtrumuhu.”
“Harimwa
zi ntrongo rasoma ritsojuwa ri rongowe huka Izu aka na twabiya za pewu. Kakovulishiya muntru. Risomo harimwa yi hadisi huka Izu aka na wantruwashe wayili,
Yehoudith na Basmath na wawo wawafanyiya Rabeka na Isiyaka ntrongo zapewu.
“
Zi ntrongo zini ziranyesa yi namna Izu akoyenshi. Na rinahane yi hadisi ya bahe wakati amwambiya amba aka
tayari ya hu mwaritisha zi baraka mana waye de wu mwana mtrumuhu. Ntrongo ntrini de wu fikiriwo Izu aka
arongowa?”
“Mkini
waye tse de mtrumuhu tsena,” Karim arongowa.
“Wuna
haki! Halilo na yelewa karumiya kweli.”
“Na
Rabeka?”
“Aka
mama akotsaha atowe taembu. Mama
kalazimu a dala na waye zilazimu yike amba aka afikiri ya makalima ya
Mungu: ‘Wu mwana mtrumuhu
atsorumishiya mtiti.’”
Be
ha huyesheleya yi hadisi yini tsikubali
huka amba Yaankubu kafanya ntrungo zanyesawo amba wawe muntru wa Mungu. Yaankubu na mamahe kawaka walazimu wadjerebu
humusayidiya Mungu hahufanya zi ntrongo zahe. Waye mtukufu. Atsofanya zizo arongowa amba atsofanya. Be Mungu aka na trongo akotsaha ayifanye mana
haheju ntrendreyo muhimu raha na maha.
Wa hendreleya husona wutsowona yi namna Mungu amufanyiya Yaankubu taembu
ha humufanya muntru yikawo de akotsaha ake.
Aka mbali na yi irhami yahe maha mengi.
Aka a taembishiwa na muntru wa yi irhami yahe. Afiliwani bahe na mahe wakati aka harimwa
ntsi ya shi wudjeni, na mtrumshe wahe afu wajawu. Huregeya yahe harimwa yi arudhu ya bahe,
Mungu amutaenbisha wuku wule. Zini
tabiya zikawo Mungu waye wurumiya wakati atsahawo abuzudze mayendreleyo ju la
yi shumbe shahe. Baenda awona zi taembu zini ya
mayesha yahe yaka ya buzu mawuri muntru wangina. Mungu aka amubuzudza ata li dzina lahe hahu
mwiyira Israila, yaenni djeshi la Mungu awu mwana washi wufawume wa Mungu.
“Nayika wu somo ya Makalima Matukufu ya Mungu, wutsopara
huka wu wantru piya walawa harimwa yi damu ya Insa waka wantru mawuri de wasi
ritsahawo muhuyizi ariswamihi ya madhambi yatru.”
Abou
amwaledza Karim huka ya Makalima Matukufu ya Mungu rangu mwandrisoni mwa yi
shiyo sha handra sha yi Taoureta ata hupara yi shiyo sha mwiso sha yi Injil,
shina ziyo sitini na sita zangihwa na wantru arubayini harimwa muda wa maha
alifu wa hamusumiya. Muhihu wa yi shiyo
tsi de hwanyesa yi namna Mungu ahukumuwo ntsi moja be de hwanyesa wumpago wa
Mungu hahuja ahuyi wu wanadamu yile wantru piya harimwa li duniya wa
barikishihe mawuri de halilo aka amumba Ibrahima miyandi maha alifu nne ya
vira.
“Wusinitsehe
Abou, be rasa tsayelewa zi baraka zalazimu zilawe harimwa yi damu ya Ibrahima?”
“Ahan,
Karim, basi de deni! Zi baraka zini wuwo
mwanadamu: Nahana Insa aka
arongowa, ‘Wami de yi ndziya, de wu
kweli na ya mayesha. Kavwasi muntru
atsoshindrawo aje ha baba nayika kavira hanguju’.”
“Rangu
mwandrisoni hoho Mungu aka afanya mpango wa huhuyi wumati wahe yile wu
sangamiye ha hwendra harimwa wu moro wa djahanamu. Humkubali Insa yiyo hukubali yi ndziya ya wu
huyizi wa Mungu.”
Wakati
Karim alawa dagoni ha Abou aka na furaha rohoni.
“Mungu
mwemwa,” adjambiya. “Mwanadamu asimukosa
Mungu, na waye asifanya ndziya za hu muhuyi abuze amuregeze julahe!”
Arongowa
mangavu: “Wunu de wu Mungu nitsahawu
nimurumishiye harimwa ya mayesha yangu piya, wakati wule aziya taxi ha hwendra
dagoni.”
Yi
hadisi ya Ibrahima na wu wantru wahe yi rengwa harimwa yi shiyo sha Genèse
harimwa yi Taoureta, ziyo 12-23; na ya makalima ya Insa ya rengwa harimwa yi
shiyo sha Yuhani harimwa yi Injil, shiyo sha kumi na nne (14).
No comments:
Post a Comment